На скопскиот аеродром со групата од стотина македонски државјани се вратија и 11-те работници кои преку македонска фирма работеа на палестинска територија, во Рамалах на Западниот Брег кога во саботата започнаа терористичките напади и воените дејства во Израел.

Во наредните два дена овие 11 македонски работници успеале да дојдат до Тел Авив од каде со денови чекаа да се организира превоз до Македонија, кој се случи денеска со авион на Ер Србија, со кој покрај Македонци, од Израел се евакуираа и српски и црногорски државјани.

Со заедничка организација на трите влади и нивните амбасади во Израел со чартер лет во Скопје допатуваа околу 130 патници, кои на скопскиот аеродром беа пречекани од блиските роднини и семејствата кои со нетрпение го очекуваа пристигнувањето на летот, по една седмица помината во неизвесност и исчекување.

„Слободен печат“ беше на скопскиот аеродром и разговараше со дел од македонските и српските државјани кои се вратија од Израел, а за тоа како течело извлекувањето на групата од 11 македонски државјани од кризното подрачје во Западниот брег сведочи Константин Бундалевски.

-Имаше добри луѓе и меѓу Палестинците и меѓу Израелците кои ни помогнаа безбедно да дојдеме до Тел Авив и не сместија додека го чекавме авионскиот превоз во Скопје. Поради паниката која се појави таму, нашата фирма ни купи карти но овие комерцијални летови се откажаа, па МНР ни овозможи да се качиме на овој лет и да стигнеме до Скопје, вели Бундалевски за „Слободен печат“.

Последниве денови во Тел Авив е многу мирно, додава тој.

Целиот разговор погледнете го во видеото: