Почетокот на 42. издание на Скопскиот џез фестивал, кој ќе се одржи од 19 до 22 октомври, ќе се случи на 19 октомври во Националната опера и балет. Грижливо селектираната програма, покрај императивот за одржување на високиот интернационален рејтинг на фестивалот и традицијата тој да го претстави најдоброто од светот на џезот и импровизираната музика, годинава ја повикува публиката на будно следење на вредните концертни настани во согласност со мотото на Гард Нилсен Суперсоник Оркестра: „Ако слушаш внимателно, музиката ќе биде твоја!“.

Единаесет светски етаблирани состави од САД, Европа, Бразил и Македонија ќе ја претстават својата музика во Националната опера и балет и во МКЦ. Програмата, распоредена во четири вечери, е исклучително силна, разновидна и исполнета со низа ексклузивни настапи на некои од најголемите имиња на современиот џез и креативната музика денес.

Фестивалот годинава ќе го отвори ексклузивната премиерна изведба на делото „After the Wildfire“, специјално, исклучиво за оваа прилика, компонирано од норвешките џез-ѕвезди Арве Хенриксен и Јан Банг како солисти, заедно со перкусионистот Ингар Зак. Музиката е аранжирана и под диригентство на Џијан Емин за „Fame’s Institute Orchestra“, а во изведбата ќе бидат вклучени и неколку познати македонски пејачки и кавалџии.

Истата вечер во МКЦ ќе настапи култниот композитор, корнетист, пејач, поет и еклектичен ерудит Бен Ламар Геј со неговиот ансамбл. Станува збор за еден од најоригиналните џез-уметници денес, претставник на инспиративната чикашка музичка сцена и потписник на водечката издавачка етикета во светот кога е во прашање современата креативна музика – „International Anthem“. Звукот на Геј поседува уникатен, препознатлив стил што тој го нарекува „Pan-American“, со широк спектар на влијанија: од џез до фанк, од Ар-ен-би до тропикалија и од хип-хоп до електро и современа класика.

Како дел од придружната програма на фестивалот, на 13 октомври беше промовирано новото ЦД-издание на „SJF Records“, албумот „All the Sad Words in the Beggar’s Dictionary“ на Филип Букршлиев Трио, а на 15 октомври во кино „Фросина“ во МКЦ беа прикажани две врвни документарни филмски остварувања од областа на џез-музиката: „Art Pepper: Notes From a Jazz Survivor“ (Арт Пепер: белешки на еден преживеан џезер) и „Music for Black Pigeons“ (Музика за црни гулаби).

Во рамките на фестивалот ќе биде доделена и веќе традиционалната Награда за најдобар млад џез-музичар во 2023 година, а ќе биде организирана и Џез работилница за деца „Jazz for Kids”. Скопскиот џез фестивал и годинава, во соработка со УНХЦР, продолжува да го негува проектот „Џез за солидарност со бегалците“, упатувајќи уште еден гласен апел за емпатија, сочувство со неправедно и насилно раселените, обездомените, обезнадежените.