Во Италија со голема возбуда се очекува неделното дерби помеѓу Милан и Јувентус, а пред овој натпревар тимот на Милан се соочува со сериозни проблеми на голманската позиција.

Првиот голман на Милан, Мајк Мањан како што е познато доби црвен картон на претходниот натпревар од Серија А против Џенова, па поради тоа нема да може да го чува голот на својот тим.

Но, проблемите за Пиоли станаа поголеми кога голманот Марко Спортиело го повреди листот на ногата и го чека пауза од десетина дена.

Поради ваквата ситуација најверојатно на голот на Милан против Јувентус ќе застане, Антонио Миранте кој има 41 година. Последен пат Миранте бранеше во април 2021 година како голман на Рома.

Интересно што исто така и Јувентус против кого ќе треба да брани по две години седење на клупа е негов поранешен клуб.